Yii a ʿAbdʋllaah ɭbn ʿAmr nengẽ, (Wẽnd yard be b yiibã yĩnga), tɩ Wẽnd Tẽn-tʋʋma, (Wẽnd pʋʋsg lɑ A tɩlgr be ɑ yĩngɑ) a yeelame: «Yãmb yem kãm fãa gilli yaa gũuda, la yem kãm fãa gill me, b na n sok-a-la a rũmsã yelle, limaam yaa gũuda, b na n sok-a-la a bõn-gũudɩ wã yelle, rao me a yaa gũuda a zakã rãmbẽ, b na n sok-a lame a bõn-gũudɩ wã yelle. Pag me yaa gũuda a sɩdã zakẽ, b na n sok-a lame a bõn-gũudɩ wã yelle. Sõgnɑ yẽ me yaa gũuda a zu-soabã arzεkẽ, b na n sok-a lame a bõn-gũudɩ wã yelle. Yãmb yembr fãa yaa gũuda, b nɑ n sok-y lame y bõn-gũudɩ wã yelle» .

Yii a Aɩsa nengẽ, -Wẽnd yard be a yĩnga- a yeelame: m wʋma Wẽnd Tẽn-tʋʋmã -Wẽnd pʋʋsg la A tɩlgr be a yĩnga- t'a yet mam ro-kãngã pʋgẽ: "m Soabã, ned ning sẽn wa n lʋɩ mam poorẽ rãmbã yell taoore, n weoog-ba bɩ F weoog a zugu, la ned ning sẽn wa n lʋɩ mam poorẽ rãmbã yell taoore, n zoe b nimbaanegã, bɩ F zoe a nimbaanega".

Yii a Tamiim Addaary nengẽ -Wẽnd yard be a yĩnga- tɩ Nabiyaamã -Wẽnd pʋʋsg la A tɩlgr be a yĩnga- yeelame: «Dĩinɑ yɑɑ mɑɑn pʋ-peelem» tɩ tõnd yeele: ne ãndɑ? T'ɑ yeele: «ne Wẽnd lɑ A Gɑfã lɑ A Tẽn-tʋʋmã lɑ lɩslɑɑmbã tɑoor rãmbɑ lɑ b zãngã».

Yii a Aɑɩsa nengẽ, -Wẽnd yard be a yĩnga- a yeelame: Wẽnd Tẽn-tʋʋma, (Wẽnd pʋʋsg la A tɩlgr be a yĩnga), a karema Aayae-kãngã {Yẽndɑ n sik Gɑfã fo zugu tɩ Aayɑy-rãmb mɑɑnɑ sẽn yɑɑ vẽenegɑ be ɑ pʋgẽ, lɑ yɑɑ rẽ lɑ gɑfã yẽgrã, lɑ ɑ sãndɑ mɑɑnɑ pɑ vẽeneg ye, lɑ kedgrã sẽn be b rãmb sũyẽ wã, bãmb pʋgdɑ gẽdem-gẽdmã, tɩ yɑɑ yεl bɑoobo lɑ ɑ welsgo ne bãmb yõe yɑm-leoogo, lɑ yɑool n pɑ mi ɑ võorã rẽndɑ Wẽnde, lɑ sẽn tɑɑb tẽkɑ bãngr pʋgẽ wã yetɑme: " tõnd kõo sɩd ne-ɑ, fãɑ yii tõnd Soɑbã nengẽ". Lɑ pɑ tɑgsd n getẽ rẽndɑ yɑm-bεεl rãmbɑ.} [Aalʋ ɭmraan: 7], d ma a Aɑɩsa yeelame: Wẽnd Tẽn-tʋʋma, (Wẽnd pʋʋsg la A tɩlgr be a yĩnga), yeelame: “rẽnd fo sã n yã neb nins sẽn pʋgd mɑɑnɑ sẽn pɑ vẽenegã, Alkʋrãanã pʋgẽ wã, bɩ f bãng tɩ yaa bãmb la Wẽnd sẽn pʋdã, bɩ f gũus-ba».

Yii a Abɩɩ Saʿɩɩd Al-ẖʋdriy nengẽ (Wẽnd yard be a yĩnga), a yeelame: mam wʋma Wẽnd Tẽn-tʋʋma, (Wẽnd pʋʋsg la A tɩlgr be a yĩnga), t’a yetẽ: « Ned ning sẽn wa n yã yel kitgɑ, bɩ a tedg-a ne a noorã, la a sã n ka tõe rẽnda, bɩ a tedg-a ne a zɩlemdã, la a sã n ka tõe rẽnda, bɩ a tedg-a ne a sũurã, la yẽnda n tʋg n yɩɩd ne lɩɩmaɑng sẽn yaa valanga. »

Yii a Annu’umaan ɭbn Bašɩɩr nengẽ, (Wẽnd yard be b byiibã yĩnga), tɩ Wẽnd Tẽn-ntʋʋma, (Wẽnd pʋʋsg la A tɩlgr be a yĩngɑ) yeelame: «Ned ning sẽn yãs Wẽnd todsẽ wã n ka lʋɩt a pʋgẽ la sẽn lʋɩ a pʋgẽ wã bilgri, yaa wala neb sẽn na n kẽ koglg pʋgẽ, tɩ sãnda paam yĩngrã, tɩ sãnda be tẽngrã, tɩ sẽn be-b tẽngrã sã n rat n teoog koomã, b pɩʋʋgda yĩngrã, tɩ b yeele: tõnd sã n pãrg tõnd nengẽ wã võore n teoogd beenẽ la d ra nams neb nins sẽn be yĩngrã ye, rẽnd koglgã rãmb sã n bas bãmbã ne b sẽn rat bũmb ningã, b fãa na n halkame, la b sã n gãd-ba b põsdame, tɩ b fãa põse».

Yii Abɩɩ Hʋrɑyrɑt nengẽ (Wẽnd yɑrd be ɑ yĩngɑ) tɩ Wẽnd Tẽn-tʋʋmɑ (Wẽnd pʋʋsg lɑ A tɩlgr be ɑ yĩngɑ) ɑ yeelame: «Ned ning sẽn boola n tʋg kãndgre, a soab tara keoore wala neb nins sẽn pʋg-a wã, tɩ rẽndã me ka boogd bãmb keoorã baa fʋɩ. La ned ning sẽn boola n tʋg menengo, ad yẽ me tara zũnuuba, wala neb nins sẽn pʋg yẽ wã zũnuub bilgri, tɩ rẽnda ka boogd bãmb zũnuubã baa fʋɩ».

Yii a Abɩɩ Mas'ʋʋd Al-ansaary nengẽ -Wẽnd yard be a yĩnga- a yeelame: Raoa n wa Nabiyaamã nengẽ -Wẽnd pʋʋsg la A tɩlgr be a yĩnga- n yeele: ad mam rũngã halkame, bɩ f bao rũng tɩ m zombe, tɩ Nabiyaamã yeele: " m ka tar ye" la rao yeele: Wẽnd Tẽn-tʋʋma, m na n wilg-a-la ned ning sẽn na n kõ-a rũng t'a zombe, tɩ Wẽnd Tẽn-tʋʋmã -Wẽnd pʋʋsg la A tɩlgr be a yĩnga- yeele: "Ned ning sẽn wa n wilg sõma zĩigã, a tara yel-sõmb wala sõmã wã maand bilgri".

Yii a Sahl ɭbn Sa'ʿad nengẽ, (Wẽnd yard be a yĩnga) sẽn yi Wẽnd Tẽn-tʋʋmã nengẽ (Wẽnd pʋʋsg la A tɩlgr be a yĩnga) t'a yeela Haybar raare: «Beoogo, m na n kõo tãp-kao-kãngã raoa, sẽn nong Wẽnd la A Tẽn-tʋʋmã, tɩ Wẽnd me la A Tẽn-tʋʋmã nong-a, tɩ Wẽnd pake sẽn tu a nugu», a yeelame: tɩ nebã gãand yʋngã n sõsda: yaa ãnda la b na n kõ tãp-kaoorã, la nebã sẽn wa n vẽeg beoogã, b sãdame n kẽng Wẽnd Tẽn-tʋʋma nengẽ (Wẽnd pʋʋsg la A tɩlgr be a yĩnga), tɩ ned fãa rat tɩ b kõ-a, tɩ Nabiyaamã yeele: «a ʿAli ɭbn Abɩɩ Ṭaalib bεε?» Tɩ b yeel-a: yaa Wẽnd Tẽn-tʋʋma, ad a nin a yiibã zabdame. T'a yeele: «tʋm-y tɩ b bool-a». Tɩ b tall-a n wa ne, tɩ Wẽnd Tẽn-tʋʋma (Wẽnd pʋʋsg la A tɩlgr be a yĩnga) tʋbs a nin a yiibẽ wã n kos Wẽnd a yĩnga, t'a maage, tɩ yaa wala zabdem ra ka be ne-a ye, t'a kõ-a tãp-kaoorã, t'a ʿAli yeele: Wẽnd Tẽn-tʋʋma: m na n zaba ne-b halɩ tɩ b yɩ wala tõnd bɩɩ? T'a yeele: «maag f meng n kẽnge, halɩ n tʋg n sig b samandẽ wã, rẽ poorẽ bɩ f bool-b n tʋg lɩslaangẽ, la f togs-ba bũmb ning sẽn yaa tɩlae n zao b zugu sẽn yaa Wẽnd hakε wã tɩ m wẽen ne Wẽnde, ad Wẽnd sã n kãndg rao a yembr fo yĩnga, rẽ sõmblem ne foom n yɩɩd ne dũni yʋgem miidu (neemã yɩlma)».

Yii a Ʋmar biig nengẽ, -Wẽnd yard be b yiibã yĩnga-,a yeelame: Wẽnd Tẽn-tʋʋma, -Wẽnd pʋʋsg la A tɩlgr be a yĩnga- yeelame: "Ned ning sẽn wa n tʋg n wõns a meng ne neba, yẽ me lebga bãmba".

Yii ɑ Abɩɩ Hʋrɑyrɑt nengẽ (Wẽnd yɑrd be ɑ yĩngɑ) ɑ yeelɑme: tɩ Wẽnd Tẽn-tʋʋma (Wẽnd pʋʋsg la A tɩlgr be a yĩngɑ) a yeelame: «Ned fãa bee a nong-n-taag na-kẽndr zugu, bɩ yãmb yembr fãa tags n ges ned ning a sẽn na n rɩk n maan a zaoa».

Yii a Tamiim Ad-daary nengẽ, (Wẽnd yard be a yĩnga), a yeelame, Wẽnd Tẽn-tʋʋma, (Wẽnd pʋʋsg la A tɩlgr be a yĩnga) a yeelame: «Yel-kãngã na n taa zĩig fãa yʋng la wĩndg sẽn taẽ, la Wẽnd ka na n bas tẽng pʋgẽ roto, A ka na n bas gãnd zagse, rẽndame t'A kẽes-a dĩin-kãngã, ne nin-tɩrg tɩrlem, mɑɑ yaand yaalgo, tɩrlem Wẽnd sẽn na n zɩsg lɩslaamdã ne-a, la yaalgo Wẽnd sẽn na n yaal kɩfẽndã ne-a». La a Tamiim Ad-daary rag n yɩɩme n yetẽ: mam bãnga yel-kãngã m zakã rãmbẽ, ad neb nins sẽn tuubã b paama sõmblem la zɩslem la zu-zẽkre, la neb nins sẽn kell n pa kɩfẽndã pʋgẽ wã yaalg la paoogr la yãnd n paam-ba.