Yii a Ʋmar ɭbn Al-hattaab nengẽ - Wẽnd yard be a yĩnga-: a yeelame: Wẽnd Tẽn-tʋʋmã, -Wẽnd pʋʋsg la A tɩlgr be a yĩnga- yeeleme: «Ad tʋʋmã tũudɑ ne Anniya-rãmbã, lɑ ɑd ned fãɑ sẽn dɩk Anniy ningã n be ne-ɑ, rẽnd ned ning sẽn maana Higra (yik Mɑk n kẽng Mɑdiinã) tɩ yɑɑ Wẽnd lɑ A Tẽn-tʋʋmã yĩngɑ, rẽnd yẽ soɑb Yikrã yɩtɑ Wẽnd lɑ A Tẽn-tʋʋmɑ yĩngɑ, lɑ ned ning Yikrã sẽn wɑ n yɑɑ dũni yĩnga n rɑt n nɑ n pɑɑm-ɑ, mɑɑ yɑɑ pɑgɑ lɑ a rɑt n furi, rẽnd yẽ yikrã yɑɑ ɑ sẽn yik n kẽng bũmb ning yĩngã». La gom-bila a yembr n be Albʋhaary pʋga: « Ad tʋʋmã yaa ne Anniy-rãmbã, la ninsaal fãa yaa a sẽn maan Anniy ningã n be ne-a».

Yii a ʿAaɩša nengẽ (Wẽnd yard be a yĩnga) a yeelame: Wẽnd Tẽn-tʋʋmã yeelame (Wẽnd pʋʋsg la A tɩlgr be a yĩngɑ): «Ned ning sẽn wɑ n tɩʋʋs bũmb tõnd yel-kãngɑ pʋgẽ, sẽn pɑ be ɑ pʋgẽ, tʋʋm-kãngɑ pɑ reegd ye» A Bʋhaarɩ la a Muslim n reeg-a. La a Muslim welg n yeelame: "ned ning sẽn maana tʋʋmde, tɩ ka tõnd n sagelle, ad rẽnda lebd n kõ a soabã».

Yii a Ʋmar ɭbn Al-hattaab nengẽ, -Wẽnd yard be a yĩnga-, a yeelame: Raar a yembr tõnd sẽn da zĩ Wẽnd Tẽn-tʋʋm nengẽ, -Wẽnd pʋʋsg la A tɩlgr be a yĩnga-, la raoa sẽn puk tõnd nengẽ, t'a futã peelem yaa wʋsgo, t'a zugã zoobd sablem yaa wʋsgo, b ka ne sor vũun a zug ye, ned baa a yembr me ka mi-a tõnd pʋgẽ, halɩ t'a wa tʋg n zĩnd Nabiyaama nengẽ, -Wẽnd pʋʋsg la A tɩlgr be a yĩnga-, n tik a rũm a yiibã n teeg Nabiyaamã rũmã, n rɩk a nus tal a yiibã n rogl a gε a yiibã zugu, n yeele: « Mʋhammade, wilg maam lɩslaang sẽn yaa a soaba, t'a yeele: « tɩ Wẽnd Tẽn-tʋʋma, -Wẽnd pʋʋsg la a tɩlgr be a yĩnga-, yeele: « lɩslaangã yaa f maan kaset tɩ soab sẽn na n tũ n tɩlg ka be rẽnda Wẽnde, la a Mʋhammad yaa Wẽnd Tẽn-tʋʋma, la f yals ne Pʋʋsgo la f yãk Zaka n kõ, la f loe Ramadaane, la f kaag Roogã tɩ f sã n paam sor n na n tʋg beenẽ». La a yeele: « f togs sɩda». T'a Ʋmar yeele: «tɩ tõnd maan yel-solemd ne-a, a sẽn sokd Nabiyaamã la a leb n sɩdgd-a wã». La raoa yeele: « bɩ f kõ maam kibare sɩd-kũun sẽn yaa a soaba»,Tɩ Nabiyaamã yeele: « yaa f kõ sɩd ne Wẽnde, la A malεgsã la A Gaf-rãmbã la A Tẽn-tʋʋmbã la Yaoolem Raarã, la f kõ sɩd ne Pʋlengã, a wẽnga la a sõma». La a yeele: « f togsa sɩda». T'a yeele: « bɩ f togs maam manegre». La a yeele: «yaa fo tũ Wẽnde, tɩ yaa wala fo ne-A lame, bala fo sã n yɩ n ka ne-A, ad A ne-f lame». T'ɑ yeele: «bɩ f togs mɑɑm dũni yikr wɑkato», lɑ ɑ yeele: «ɑd fo pɑ mi-ɑ mɑ me kɑ mi-ɑ», t'ɑ yeele: « bɩ f togs mɑɑm ɑ tɑgms-rãmbɑ». T'ɑ yeele: «yɑɑ yamb poɑkɑ sẽn nɑ n wɑ rog ɑ zu-soɑbɑ, lɑ fo sẽn nɑ n wɑ yã nɑ-zɑɑlã rãmbɑ sẽn yɑɑ bεεlɑ rãmbɑ sẽn yɑɑ tɑlsã n yɑɑ rũm-gũudbã, tɩ b wogend meebã». Rẽ poorẽ t'ɑ looge tɩ mɑm zĩnd woko, rẽ poorẽ tɩ Nɑbiyɑɑmɑ yeele: « Ʋmɑru! Fo mii ned ning lɑ sokdɑ bɩɩ?» Tɩ mɑm yeele: «Wẽnd la A Tẽn-tʋʋmɑ n yɩɩd minim». T'ɑ yeele: « ɑd yɑɑ a Gibriilɑ, ɑ wɑɑme n wilgd yãmbɑ y dĩinã».

Yii a ʿAbdʋllaah ɭbn ʿƲmar nengẽ, (Wẽnd yard be a yĩnga), a yeelame: Wẽnd Tẽn-tʋʋmã, (Wẽnd pʋʋsg la A tɩlgr be a yĩngɑ) yeelame: «B mee lɩslɑɑngã zeng raad a nu zugu, yaa kõ sɩda tɩ soab ka be sẽn tũud n tɩlg tɩ pa Wẽnd ye, a Mʋhammad me yaa Wẽnd Tẽn-tʋʋma, la Pʋʋsgã yãnesgo, la Zak kũuni, la Roogã kaagre, la Ramadaanã no-loeere».

Yii a Mu’aaz nengẽ, Wẽnd yard be a yĩnga, a yeelame: Mam rag n zao Nabiyaamã poorẽ, Wẽnd pʋʋsg la A tɩlgr be a yĩnga, bõang zug, b sẽn boon tɩ Ʋfayr, tɩ Nabiyaamã yeele : « Mu’aaze ! Rẽ yĩnga fo mii Wẽnd hakε wã sẽn zao A yembsã zugu, la yembsã hakε sẽn zao Wẽnd zug bɩɩ » ? Tɩ mam yeele : « Wẽnd la A Tẽn-tʋʋmã, n mi rẽnda ». t’a yeele : « bɩ f bãnge tɩ Wẽnd hakε wã, yaa b tũ Wẽnde la b ra maan lagem-n-taar ne-A ye, la yembsã hakε sẽn zao Wẽnde, yaa A ra wa tʋg n nams ned sẽn ka maan lagem-n-taar ne-A baa fʋɩ ye » Tɩ mam yeele : « rẽ yĩnga, m ka na n noog nebã sũur ne rẽ » ? Tɩ Nabiyaamã yeele : « ra kõ-b ra noog-b sũur ne rẽ, tɩ b wat n teega rẽnda n bas tʋʋmã ».

Yii a Anas ɭbn Maalik nengẽ (Wẽnd yard be a yĩnga): Tɩ Nɑbiyɑɑmã (Wẽnd pʋʋsg la A tɩlgr be a yĩnga) la a Mʋ'ʿaaz rag n zao Nabiyaamã poorẽ, a rũngã zugu, t'a bool-a n yeele: « Yaa a Mʋ'ʿaaz ɭbn Gεbale» t'a Mʋ'ʿaaz yeele: (Labbayka yaa rasʋʋlʋllaah wa sa'ʿadayka= m sak-fo, m sɑk f yĩngɑ Wẽnd Tẽn-tʋʋma), noor a tãabo. Wẽnd Tẽn-tʋʋm yeele: «Ned ka be, n maan kaset tɩ (laa ɩlaaha ɩllal-Allaah, wa ɑnna Mʋhammadan rasʋʋllaah) = (M maanda kaset tɩ soab hakɩɩk pa be rẽnda Wẽnde, la m maand kaset t'a Mʋhammad yaa Wẽnd Tẽn-tʋʋma) n kõ sɩda a sũurẽ wã, rẽndame tɩ Wẽnd harm-a ne Bugmã». Rẽ poorẽ, a Mʋ'ʿaaz yeelame : Wẽnd Tẽn-tʋʋma, rẽ yĩnga, m ka na n kõ nebã kiba-noogo, sẽn na yɩlẽ tɩ b kɩdme la b noog b sũur ne Wẽnd kũun-kãnga? Tɩ Nabiyaamã yeele: «fo sã n maan woto, b na n wa teega rẽndã». La a Mʋ'ʿaaz togsa kibarã, a kũumã sasa, a sẽn yεεsd t'a na n wa paam zũnuub yĩnga t'a sã n solge.

Yii a Ṭaarɩƙ ɭbn Ʋšaym Al-ašǧa'ʿiy nengẽ (Wẽnd yard be a yĩnga) a yeelame: m wʋma Wẽnd Tẽn-tʋʋma (Wẽnd pʋʋsg la A tɩlgr be a yĩnga) t'a yetẽ: «Ned ning sẽn yeele: Laa'ɩlaaha ɭllallaah= soab sẽn na n tũ n tɩlg ka be rẽnda Wẽnde, la a kɩflg ne bũmb fãa sẽn tũudi zẽng tɩ ka Wẽnde, a arzεkã la a zɩɩmã lebga haraam ne nebã, la a geelg zaoo ne Wẽnde».

Yii a Gεεbr nengẽ, Wẽnd yard be a yĩnga, a yeelame: Raoa n wa Nabiyaamã nengẽ, Wẽnd pʋʋsg la A tɩlgr be a yĩnga, n yeele : Tẽn-tʋʋmã, waagib-rãmb a yiibã yaa bõe ? Tɩ Nabiyaam yeele : « yaa ned ning sẽn maan kaalem n ka maan lagem-n-taar ne Wẽnd baa fʋɩ, yaa tɩlae t’a kẽ arzãnã, la ned ninga sẽn maan kaalem t’a yaa sẽn maan lagem-n-taar ne Wẽnde, ne bũmbu, a kẽeda Bugumã».

Yii a ʿAbdʋllaah ɭbn Mas'ʋʋd nengẽ, (Wẽnd yard be a yĩnga), a yeelame: Nabiyaamã, (Wẽnd pʋʋsg la A tɩlgr be a yĩngɑ) yeela gomde tɩ mam yeel gomd a to, Nabiyaamã yeelame, (Wẽnd pʋʋsg la A tɩlgr be a yĩngɑ):" Ned ning sẽn maana kaalem tɩ yẽ kota gees-n-taag zẽng sẽn ka yɩ Wẽnde, a kẽeda Bugmẽ, tɩ mam yeele: ned ning sẽn maana kaalem, tɩ yẽ soab ka kot gees-n-taagɑ zẽng sẽn ka Wẽnde, a kẽeda arzãna.

Yii a ɭbn Abaas nengẽ, Wẽnd yard be b yiibã yĩnga, a yeelame: Wẽnd Tẽn-tʋʋmã (Wẽnd pʋʋsg la A tɩlgr be a yĩnga) ɑ yeelɑ ɑ Mu'ɑɑz ɭbn Gεbɑl, ɑ sẽn wɑ n tʋm-ɑ Yɑmɑnɑ: «Ad fo rabdɑ neb sẽn yɑɑ Gɑf rãmb nengẽ, lɑ fo sã n tɑ b nengẽ, bɩ f bool-bɑ n tʋg kɑset mɑɑnego, tɩ soɑb sẽn nɑ n tũ n tɩlg kɑ be rẽndɑ Wẽnde, lɑ ɑ Mʋhɑmmɑd yɑɑ Wẽnd Tẽn-tʋʋmɑ, tɩ b sã n sɑk n tũ rẽ, bɩ f kõ-b kibɑr tɩ Wẽnd mɑɑnɑ wɑkat ɑ nu tɩ yɑɑ tɩlɑe n rog-bɑ, yʋng lɑ wĩndg fãɑ, tɩ b sã n sɑk n tũ rẽ, bɩ f kõ-b kibɑr tɩ Wẽnd mɑɑnɑ doaɑg tɩ yɑɑ tɩlɑe n rog bãmb zugu, tɩ b reegd rɑkãɑgbẽ wã n kõt b tɑlsã, tɩ b sã n sɑk n tũ rẽndɑ, bɩ f gũus b arzεg yɩlmã reegre, lɑ f zoe b sẽn wẽg ɑ soɑb kãɑbgo, tɩ ɑd lill kɑ be ɑ kosgã ne Wẽnd sʋk ye».

Yii ɑ Abɩɩ Hʋrɑyrɑt nengẽ Wẽnd yɑrd be ɑ yĩngɑ t'ɑ yeelɑme: Tɩ b yeele Wẽnd Tẽn-tʋʋmɑ ãnd n yɩɩd zu-noog ne fo sugsgã dũni wã yikr rɑɑre? Tɩ Wẽnd Tẽn-tʋʋmɑ pʋʋsg lɑ tɩlgr be ɑ yĩng yeele: «Mɑm rɑ tẽedɑme ɑ Abʋʋ Hʋrɑyrɑtɑ tɩ ned rɑ reng foo n sok mɑɑm Hɑdiis-kãngã ye, mɑm sẽn ne tɩ fo tɑrɑ yã-beed ne Hɑdiisã bãngrã, ɑd nebã sẽn yɩɩd zu-noog ne mɑm sugsgã Dũni yikr rɑɑrã, yɑɑ ned ning sẽn yeelɑ tɩ lɑɑ ɩlɑɑhɑ ɩllɑl-Allɑh, n yɩlg-ɑ ɑ sũurẽ wã maɑ ɑ mengẽ wã».

Yii a Abɩɩ Hʋrayrat nengẽ (Wẽnd yard be a yĩnga) a yeelame: Wẽnd Tẽn-tʋʋma (Wẽnd pʋʋsg la A tɩlgr be a yĩnga) yeelame: «Lɩɩmaoong yaa kõbg pis-yopoe la zaka, maa pis-yoob la zaka, sẽn tʋg n zẽk n yɩɩde yaa Laa'ɩlaaha ɭllallaah» yeelgo, la sẽn tʋg n paood n yɩɩde, yaa fo sẽn na n rɩk bũmb sẽn namsd nebã n yiis sorã zugu, la ad yãn-zoεεgã, yẽ me yaa kõbg sẽn be lɩɩmaoongã pʋgẽ».