Yii a Hakɩɩm ɭbn Hizaam nengẽ, -Wẽnd yard be a yĩnga-, a yeelame: Mam yeelame: Wẽnd Tẽn-tʋʋma, kõ maam kibare, tʋʋm mam sẽn da tʋmde, Zɩɩlem sasa wã, sẽn yaa doaag maanego, la yembd bas burkĩndi, la rogem tõkre, rẽ yĩnga keoor buud n be a pʋgẽ bɩɩ ? Tɩ Nabiyaama, -Wẽnd pʋʋsg la A tɩlgr be a yĩnga-, yeel-a: “ fo tuubame n lagem ne f tʋʋm nins fo sẽn da tʋm tɩ loog tɩ yaa sõmã wã».

Yii a Anas nengẽ, -Wẽnd yard be a yĩnga-, a yeelame: Wẽnd Tẽn-tʋʋm, -Wẽnd pʋʋsg la A tɩlgr be a yĩnga- yeelame: «Ad Wẽnd ka wẽgd muunim baa yel-sõmd a yembr ye, A kõt-a-la dũni wã neemã sẽn tũ ne yel-sõmdã la A leb n rol-a rol sõngo laahr raare, la sã n yaa kɩfre, b rɩlgd-a-la dũni wã yẽ sẽn maan tʋʋm sõmbsã Wẽnd yĩngã, la a sã n wa tʋg n ta laahr raare, a ka na n tall baa yel-sõmd tɩ b na n rol-a ye».

Yii a Anas ɭbn Maalik nengẽ, (Wẽnd yard be a yĩnga) a yeelame: M wʋma Wẽnd Tẽn-tʋʋma (Wẽnd pʋʋsg la A tɩlgr be a yĩnga) t'a yetẽ: « Wẽnd yeelame (A Naam zẽk yã): Adem-biiga, ad fo sẽn kos Maam la f tẽ Maam, M yaafda foom baa fo sẽn maan bũmb ninga, tɩ M toog ka be ye, Adem-biiga! Ad fo zũnuubã sã n ta saasã, rẽ poorẽ tɩ fo kos Maam yaafa, M yaafda foom tɩ Mam toog ka be ye, Adem-biiga! A d fo sã n wa Mam nengẽ ne tʋʋm tuuts sẽn ta Tẽngã tom, rẽ poorẽ tɩ fo seg Maam, n ka maan lagem-n-taar ne Maam baa fʋɩ, Mam na wa fo nengẽ ne yaafg sẽn ta Tẽngã tom».

Yii a Abɩɩ Hʋrayrat nengẽ -Wẽnd yard be a yĩnga Yii Nabiyaamã nengẽ -Wẽnd pʋʋsg la A tɩlgr be a yĩnga-a sẽn togsd tɩ yaa sẽn yi a Soabã nengẽ, A Naam yɩ wagell n zẽke, n yeele: "Yamb maana zunuub tʋʋmde, n yeele: " Soaba Wẽnde yaaf m zunuubã". Tɩ Wẽnd yeele, A Naam yɩ wagell n zẽke: Mam yambã beegame la a leb n bãngame t'a tara Soabã sẽn yaafde la A leb n sɩbgd ne zunuuba" rẽ poorẽ tɩ yamba beege, n yeele: "m Soaba, yaaf-ma m zunnuubã, tɩ Wẽnd yeele, A Naam yɩ wagell n zẽke: " Mam yamba maana beegre, n bãng t'a tara Soaba, sẽn yaafd zunuuba la A leb n sɩbgd ne zunuuba. Tɩ yambã leb n maan zunuuba, n yeele: " m Soaba, yaaf-ma m zunuubã". Tɩ Wẽnd yeele, A Naam yi wagell n zẽke: "M yambã maana beegre, n bãng t'a tara Soaba, sẽn yaafd zunuuba, la A sɩbgd ne zunuuba, maan f sẽn rate, tɩ ad Mam yaaf-f lame".

Yii a ʿAli nengẽ, a yeelame, mam rag n yaa ned tɩ mam sã n wʋm Wẽnd Tẽn-tʋʋmã nengẽ (Wẽnd pʋʋsg la A tɩlgr be a yĩngɑ) hadiisa, Wẽnd nafda maam sẽn yi hadiisã pʋgẽ, a sẽn tʋll bũmb ninga, maa A naf maam ne-a, la ned sã n yẽs maam sẽn yi a sahaabsẽ wã, m kɩtedame t'a wẽene, t'a sã n wẽen tɩ Nabiyaamã n yeele, m kõt-a-la sɩda. La ad a Abuu Bakr togsa maam, la a Abuu Bakr yeel sɩda, a yeelame: m wʋma Wẽnd Tẽn-tʋʋmã (Wẽnd pʋʋsg la A tɩlgr be a yĩngɑ) t'a yetẽ: «Ned ka be sẽn na n tʋm zũnuuba, rẽ poorẽ n yik n yɩlge, rẽ poorẽ n pʋʋse, rẽ poorẽ t'a kos Wẽnd yaafa, rẽndame tɩ Wẽnd yaaf-a», rẽ poorẽ t'a karem Aayar-kãngã {Lɑ neb nins tɩ b sã n tʋm wẽngɑ mɑɑ b wẽgɑ b mense, b tẽegdɑ Wẽnd yelle n kos b zũnuubã yɑɑfɑ} [Aalʋ ʿɭmraane: 135].

Yii a Abɩɩ Muusa nengẽ, (Wẽnd yard be a yĩnga), tɩ yii Nɑbiyɑɑmã nengẽ, (Wẽnd pʋʋsg la A tɩlgr be a yĩnga) a yeelame: «Ad Wẽne, (A Naam yɩ wagell n zẽke) A tẽegda A nugã yʋngo, sẽn na yɩl tɩ wĩndg wẽngd tuubi, la A tẽegd A nugã wĩndgã sẽn na yɩl tɩ yʋng wẽngd tuubi, halɩ tɩ wĩndgã wa tʋg n puk a sẽn lʋɩtẽ wã».

Yii a Abɩɩ Hʋrayrat nengẽ, (Wẽnd yard be a yĩnga), tɩ Wẽnd Tẽn-tʋʋma, (Wẽnd pʋʋsg la A tɩlgr be a yĩnga) yeelame: «Tõnd Soabã sigdame, -A Naam zẽkame- yʋng fãa, n wa dũni saasẽ wã, yʋngã sẽn pʋɩ tãab n yãk yembrã sã n wa ta a baasgã zĩigẽ, n yetẽ: «Ãnd n na n kos Maam tɩ M reeg a yĩnga? Ãnd n na n kos Maam tɩ M kõ-a? Ãnd n na n kos Maam yaafa tɩ M reeg a yaafa?»

Yii a Annou’maan ɭbn Basɩɩr nengẽ -Wẽnd yard be a yĩnga-a yeelame: m wʋma Wẽnd Tẽn-tʋʋma -Wẽnd pʋʋsg la A tɩlgr be a yĩnga- t'a yetẽ, -t'a Annu'maan yɑɑ sẽn rɩk a nus a yiibã n teesd a tʋb a yiibã-: «Ad Hɑlɑɑlã yɑɑ vẽenegɑ tɩ Hɑrɑɑmã me yɑɑ vẽenegɑ, lɑ b yiibã sʋkɑ yel-gẽts n be beenẽ, tɩ nebɑ wʋsg kɑ mi-b ye, lɑ ned ning sẽn gũusɑ yel-gẽtɩ wã ɑ yɩlg ɑ dĩinã lɑ a burkĩndã, lɑ sẽn lʋɩ ɑ yel-gẽtɩ wã pʋgẽ ɑd ɑ lʋɩɩ hɑrɑɑmẽ, ɑ bilgr yɑɑ wɑlɑ rũm-kɩɩmã sẽn wãmbd yɑmd-zɑbdg kɩrengɑ ɑ sã n kɑ gũusi ɑ nɑ n wãb-ɑ lɑme, lɑ ɑd nɑɑb fãɑ tɑrɑ ɑ yɑmd-zɑbdgɑ, lɑ ɑd Wẽnd wãmneg zĩig ning sẽn zɑbdã, yɑɑ A sẽn gɩdg yεl ninsã, lɑ ɑd yĩngɑ pʋgẽ nem-võre n be beenẽ, ɑ sã n mɑnege, yĩngã fãɑ mɑnegdɑme, lɑ ɑ sã n sãɑme, yĩngã fãɑ sãɑmɑme, ɑd yẽ yɑɑ sũurã».

Yii a Abɩɩ Saʿɩɩd Al-ẖʋdriy nengẽ (Wẽnd yard be a yĩnga) a yeelame: Nɑbiyɑɑmã yeelame (Wẽnd pʋʋsg la A tɩlgr be a yĩngɑ): «Ra tʋ-y mam Ṣahaabsã ye, ad yãmb yembr sã n yãk n naf sẽn zems wala Ʋhud tãngã tɩ yɑɑ sãnem, a kõn n ta b yembr nus a yiibu, ka b nus a yiibã pʋsʋk me».

Yii a ɭbn Abbaas nengẽ, -Wẽnd yard be b yiibã yĩnga- a yeelame: M da bee Wẽnd Tẽn-tʋʋm poorẽ wã, -Wẽnd pʋʋsg la A tɩlgr be a yĩnga-, t'a yeele:" Biigɑ, ɑd mɑm nɑ n wilga foom gom-biisi, gũus Wẽnd t'A nɑ gũus-fo, gũus Wẽnd tɩ fo nɑ mik-A f togellẽ wã, f sã n nɑ n kos bɩ f kos Wẽnde, lɑ f sã n nɑ n kos sõngre bɩ f kos Wẽnde, lɑ f bãnge: tɩ nebã fãɑ sã n nɑɑg tɑɑbɑ n nɑ nɑf foom ne bũmbu, b pɑ nɑ n nɑf foom rẽndɑ ne bũmb ningɑ Wẽnd sẽn gʋls n kõ foomã, b sã n leb n tigim tɑɑbɑ n nɑ n nɑms foom ne bũmbu, b pɑ tõe n nɑms foom rẽndɑ ne bũmb ning Wẽnd sẽn gʋls n doglg foomã, gʋls-mخod zẽkɑme, sεbã me kʋɩɩme».

Yii a Sufyaan ɭbn ʿAbdʋllaah Aṯ-ṯaƙafiyyi nengẽ, (Wẽnd yard be a yĩnga), a yeelame: M yeelame: yaa Wẽnd Tẽn-tʋʋmã, wilgd maam gomde, lɩslaangã pʋga, m sẽn kõn n le sok-a ned baa a yembr sã n ka foom, t'a yeele: «yeele: m kõo sɩd ne Wẽnde, rẽ poorẽ, tẽeg tɩrga».

Yii a An-nu’ʿmaan ɭbn Bašiir nengẽ, (Wẽnd yard be a yĩnga), tɩ Wẽnd Tẽn-tʋʋma, (Wẽnd pʋʋsg lɑ A tɩlgr be ɑ yĩngɑ) yeelame: «Muumin-rãmbã bilgri, b nong-taabã la b yols-taabã la b nim-bãan-zoεεgã pʋgẽ, b yaa wala yĩnga, yĩn-will sã n zĩnd beenẽ n zabdẽ, la yĩngã fãa gill sẽn boond taab n lagem-a ne gõeem basbo la yĩn-zabre».