Yii Abɩɩ Hʋrɑyrɑt nengẽ (Wẽnd yɑrd be ɑ yĩngɑ) a yeelɑme: Wẽnd Tẽn-tʋʋmɑ (Wẽnd pʋʋsg lɑ A tɩlgr be ɑ yĩngɑ) ɑ yeelame: «M wẽen ne Naab ning mam yõorã sẽn be A Nugẽ wã, keta bilf t'a Maryam biig sig yãmb pʋgẽ, t'a Bʋʋdã yaa tẽeg tɩrga, n kao pikã, la a kʋ kurkuyã, la a bas yõor yaoob reegre, tɩ arzεkã wʋsge, halɩ tɩ ned baa a yembr ka reegd-a ye».

Yii a Abɩɩ Hʋrayrat nengẽ, -Wẽnd yard be a yĩnga- a yeelame: Wẽnd Tẽn-tʋʋma, (Wẽnd pʋʋsg la A tɩlgr be a yĩnga), yeela a saambɩbã: «yeel tɩ soab sẽn na n tũ n tɩlg ka be rẽnda Wẽnde, tɩ m na maan kaset n fãag-fo gom-kãngã sabab yĩnga, dũni yikr raarã», tɩ saambɩba yeele: sã n ka Ƙʋrays-rãmbã sẽn na n wa zang maam yĩnga, n yetẽ tɩ yaa kũumã yεεsg la rabeem n kɩt tɩ m yeel gom-kãngã, m rag n na maag f sũuri ne gomdã yeelgo, wakat-kãngã tɩ Wẽnd na n sik Nabiyaamã zugu {Ad fo ka kãndgd fo sẽn noang-a soab ye, yaa Wẽnd n kãndagd A sẽn tʋlle} [Al-ƙasas: 56].

Yii a Abdʋllaah ɭbn Amr nengẽ, -Wẽnd yard be a yĩnga-, a yeelame: Wẽnd Tẽn-tʋʋma, -Wẽnd pʋʋsg la A tɩlgr be a yĩnga- yeelame: «Mam bãkã Wẽnd sẽn waoog maam ne-a wã laahr raarã, a woglemã yaa kiuug kẽnd tεka, a koomã peelem yɩɩda bĩisim, t’a yũugã noom yɩɩd misk parfẽ, la a ko-teesã sõorã yaa wala saagã ãdse, ned ning sẽn wa n paam bũmb n yũ beenẽ, ko-yũud kõn n leb n yõk-a ye».

Yii a Abɩɩ Saɩɩd Alhudry, -Wẽnd yard be a yĩnga-, a yeelame, Wẽnd Tẽn-tʋʋma, -Wẽnd pʋʋsg la A tɩlgr be a yĩnga-, yeelame: «B na n waa ne kũum t’a wõnd pesg sẽn tẽgse, tɩ boaand boole : «yaa yãmb a arzãn koamba!» Tɩ bãmb sɩndg n getẽ, t’a yeele, rẽ yĩnga yãmb mii yãwã bɩɩ? Tɩ b yeele, n-yee, yãwã la kũum, tɩ b fãa gill yã-a. Rẽ poorẽ t’a lebg n boole: « yaa yãmb a Bugum koamba!» Tɩ bãmb me sɩndge n zẽk n yetẽ, t’a yeele, la yãmb mii yãwã bɩɩ? Tɩ b yeele, n-yee, yãwã la kũum, b fãa gillã me yã-a lame, tɩ b koadg-a, rẽ poorẽ tɩ b yeele: arzãn koambã, yãmb na n duumame tɩ kũum ka leb n be ye, yãmb a Bugum koamb me y na n duumame tɩ kũum ka be ye, rẽ poorẽ tɩ Nabiyaamã kareme {La bugs-b ne nĩmsã raarã, yellã sẽn wat n bʋ wã; tɩ bãmb yaool n be yam yaal-yaal pʋgẽ n ka kõt sɩd ye.} [Maryam: 39], bãmbã la dũni yam yaal-yaal neba {n ka kõt sɩd ye} [Maryam: 39]».

Yii a Ʋmar ɭbn Al-hattaab nengẽ, -Wẽnd yard be a yĩnga-, t'a wʋma Wẽnd Tẽn-tʋʋma, -Wẽnd pʋʋsg la A tɩlgr be a yĩnga- t'a yetẽ: "Yãmb sã n dag n bobend-y mensã boblg tεkẽ, A rag na rɩlg yãmb wala A sẽn rɩlgd liuuli wã, b yikda tõd beoogo tɩ b pʋsã yaa tabla n ta zaabr tɩ b pʋsã pidi".

Yii a Abʋʋ Hʋrayrat nengẽ (Wẽnd yard be a yĩnga) a yeelame: Wẽnd Tẽn-tʋʋmã (Wẽnd pʋʋsg la A tɩlgr be a yĩnga) a yeelame-: «Zoambd n ningd sẽn kẽnda sallem, tɩ sẽn kẽndɑ n ningd zĩid sallem, tɩ neb kɩdg ning neb wʋsg sallem».

Yii a Abɩɩ Zarr nengẽ, -Wẽnd yard be a yĩnga-: Yii Nabiyaamã -Wẽnd pʋʋsg la A tɩlgr be a yĩnga- a sẽn reeg n yi Wẽnd nengẽ, A Naam yɩ wagell n zẽke, A yeelame: «Yaa Mam yembse, ad Mam gɩdga wẽgd Mam zugu, n maan-a t'a yaa haraam yãmb ne taab sʋka, bɩ y ra wẽg taab ye, yãmb fãa gill yaa menemdba, sã n ka Mam sẽn kãnd a soaba, bɩ y bao kãndagr ne Maam tɩ M na kãndag-ya, Mam yembsã fãa gilli, yãmb yaa kombse, sã n ka Mam sẽn rɩlg a soaba, bɩ y bao rɩlgr ne Maam tɩ M na rɩlg-ya, Mam yembsã, yãmb fãa yaa zaala, sã n ka Mam sẽn yeelg a soaba, bɩ y bao yeelgr ne Maam tɩ M na yeelg-ya, Mam yembsã, yãmb tudgda yʋng la wĩndga la Maam n yaafd zunuubã zãnga, bɩ y kos yaafa ne Maam tɩ M yaaf-ya, Mam yembsã, yãmb ka na n tol n ta Mam namsgo, n na n nams Maam ye, y ka na n tol n ta mam nafa n na n naf-M ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã n yɩ n zoet Wẽnd tɩ yaa wala yãmb sʋka sẽn yɩɩda Wẽnd zoεεg sũuri, rẽnda ka na n paas Mam Naamã baa fʋɩ ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã lagem taaba n na n kɩɩs Wẽnd tɩ yaa wala yãmb sʋka nin-wẽng sũuri, rẽnda ka na n boog Mam Naamã baa fʋɩ ye, yãmb yembsã la tɩ yãmb rẽenem rãmba, la y yaoolem rãmba, la y ninsaalb la y zĩn-rãmba, b sã n yik n tɩ be zĩ-peell a yembre, n kos Maam tɩ mam kõ ned fãa a sẽn kosã, yẽ ka na n boog bũmb ning sẽn be Mam nengẽ, sã n ka wala sũpĩim sẽn boogd bũmb ningã tɩ b sã n kẽes-a mogrẽ, Mam yembsã, ad yaa yãmb tʋʋmã bala, tɩ Mam tigm-a n wa rol-ya, rẽnd ned ning sẽn wa n mik tɩ yaa sõma, bɩ a pẽg Wẽnde, la sẽn mika tɩ ka rẽ, bɩ a ra sãbs ned baa a yembr sã n ka a menga».

Yii a Gεεbr ɭbn ʿAbdʋllaah nengẽ, (Wẽnd yard be b yiibã yĩnga), tɩ Wẽnd Tẽn-tʋʋmã (Wẽnd pʋʋsg la A tɩlgr be a yĩnga), yeelame: «Zoe-y wẽgdo, tɩ ad wẽgd yaa ligs dũni yikr raarã, la y zoe beedo, tɩ ad beed n halk sẽn reng-b yãmb taoore, a yɩɩ sabab n tall bãmb n na n wɩdem b zɩ-rãmba la b maan haraam».

Yii a Abuu Muusɑ nengẽ (Wẽnd yard be a yĩnga) a yeelame: Wẽnd Tẽn-tʋʋma (Wẽnd pʋʋsg la A tɩlgr be a yĩnga) yeelame: «Ad Wẽnd tõe n yaoolga wẽgdã, t'A sã n wa yõk-a a ka põsgd-A ye» a yeelame: rẽ poorẽ t'a karem: «{Lɑ yɑɑ woto la f Soabã yõkrã, t'A sã n yõk tẽng tɩ b yɑɑ wẽgdba, ad fo Soabã yõkrã zabda wʋsgo} [Huud: 102]»

Yii a ɭbn Abaas nengẽ, Wẽnd yard be b yiibã yĩnga Tɩ yii Nɑbiyɑɑmɑ -Wẽnd pʋʋsg lɑ A tɩlgr be ɑ yĩngɑ- ɑ sẽn reeng n yi ɑ Soɑbɑ nengẽ- A nɑɑm yɩ wɑgell n zẽke- t'A yeelɑme: «Wẽnd pʋlmɑ tʋʋm sõmbsã lɑ tʋʋm wẽnsã, rẽ poorẽ t'A vẽneg rẽ, rẽnd ned ning sẽn sɑɑgɑ yel-sõmde lɑ ɑ Kɑ mɑɑne, Wẽnd gʋlsd-ɑ-lɑ A nengẽ n kõ-ɑ yel-sõmd sẽn pidi, lɑ ɑ sã n sɑɑg-ɑ lɑ a mɑɑn-ɑ Wẽnd gʋlsd-ɑ-lɑ A nengẽ n kõ-ɑ yel-sõmd piigɑ n tʋg n tãɑg fãoob kobs-yopoe, n tʋg n tãɑg fãoob wʋsgo, lɑ sẽn sɑɑgɑ ne tʋʋm wẽngɑ lɑ ɑ Kɑ tʋm-ɑ Wẽnd gʋlsd-ɑ-lɑ A nengẽ yel-sõmd sẽn pidi, lɑ ɑ sã n sɑɑg-ɑ n mɑɑn-ɑ, Wẽnd gʋlsdɑme n kõ-ɑ yel-wẽng ɑ yembre».

Yii a ɩbn Masʋʋd nengẽ, Wẽnd yard be a yĩnga, a yeelame: Tɩ ned n yeele : Wẽnd Tẽn-tʋʋma, rẽ yĩnga, Wẽnd na n yõka tõnd ne d sẽn tʋm Zɩɩlmã sasa wa bɩɩ? T’a yeele : « ned ning sẽn manega lɩslaoongã pʋgẽ, b ka yõkd-a ne bũmb ninga a sẽn tʋm Zɩɩlmã sasa ye, la ned ning sẽn wẽnga lɩslaoongã pʋgẽ, b yõkd-a la ne a rẽenem la a yaoolem tʋʋm fãa ».

Yi a ɭbn Abaas nengẽ, (Wẽnd yard be b yiibã yĩnga): Ad neb sẽn yi lagem-n-taarã rãmbẽ, b rag n yɩɩme n kʋ la b wʋsg kʋʋbã, la b yo la b wʋsg yoobã, tɩ b wa a Mʋhammad nengẽ, (Wẽnd pʋʋsg la A tɩlgr be a yĩnga), n yeele: " ad fo sẽn yet bũmb ninga la f boond n tʋgdẽ wã be neere, la fo sã n da kõ tõnd kibare, tɩ tõnd sẽn da maan tʋʋm ningã tara yaafa, d na kẽ dĩinã, tɩ Aayarã na n sigi {Bãmb la neb nins sẽn pa boond soab zẽng n lagem Wẽnde, la b pa kʋʋd yõor ning Wẽnd sẽn gɩdgã rẽndame tɩ tũu ne hakε, b leb n pa yood ye, la ned ning sẽn tʋm woto, a na n paama sɩbgre} [Al-fʋrƙaanu: 68]. La leb n sigi: {Yeele: "Mam yembs nins sẽn maan n zʋʋg b mens zugu! Ra wãag-y tẽeb ne Wẽnd yolsgã ye, ad Wẽnd yaafda zũnuubã zãnga, ad Yẽnda la yaafg Naab n yaa Yoalsda"}. [Az-zumarʋ: 53].