Yii a ʿƲsmaan ɭbn ʿAffaan nengẽ - Wẽnd yard be a yĩnga-: a yeelame: Wẽnd Tẽn-tʋʋmã, (Wẽnd pʋʋsg la A tɩlgr be a yĩnga) yeeleme: «Ned ning sẽn yõka koom, n maneg a koomã yõkre, a tʋʋm tuuti wã yitame n bas-a a yĩngẽ wã, halɩ n wa tũ a nug-yẽesã tẽngrã n yi»

Yii a Abɩɩ Hʋrayrat nengẽ (Wẽnd yard be a yĩnga) a yeelame: Raoa n sok Wẽnd Tẽn-tʋʋmã, (Wẽnd pʋʋsg la A tɩlgr be a yĩngɑ) n yeele: Wẽnd Tẽn-tʋʋmã, ad tõnd kẽeda mogre la tõnd zãada koom bilfu, d sã n yõg koom ne-a ko-yũud na n yõka tõndo, rẽ yĩnga d tõeeme n yõk ne mogrã koom bɩɩ? Tɩ Wẽnd Tẽn-tʋʋmã yeele (Wẽnd pʋʋsg la A tɩlgr be a yĩngɑ): «Ad yaa yẽ bal la koom ning sẽn tõe n tall n yɩlgã, t'a gɩf me yaa halaale».

Yii a 'Abdʋllaah ɭbn 'Amr nengẽ (Wẽnd yard be b yiibã yĩnga) a yeelame: b soka Wẽnd Tẽn-tʋʋmã (Wẽnd pʋʋsg la A tɩlgr be a yĩnga) koom yelle, la bũmb ning sẽn wat beenẽ, sẽn yaa bõn-yãnemdi la we-rũmsi, t'a yeele (Wẽnd pʋʋsg la A tɩlgr be a yĩnga): «Koom sã n ta sĩntog a yiibu rẽgd ka leb n kẽed-a ye».

Yii a Abɩɩ Ayʋʋb Al-ansaary nengẽ (Wẽnd yard be a yĩnga) tɩ ad Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yeelame: «Yãmb sã n na n maan we-kεεnga, bɩ y ra tees Alkiblã, ra gũd-y-yã-a y zãn-kuidgã ye, tees-y wĩndg sẽn pukdẽ maa a sẽn luɩtẽ», a Abʋʋ Ayyʋʋb yeelame: tɩ tõnd kẽng saam n tɩ mik ko-solsɩds sẽn me n tees Alkiblã, tɩ tõnd kɩlledẽ la d kot Wẽnd yaafa, (A Naam zẽkame).

Yii a Abʋʋ Hʋrayrat nengẽ (Wẽnd yard be a yĩnga) a yeelame: Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yeelame-: «Yãmb ned fãa ra wa tʋg n gãd a taoorã ne a rɩtgã n rʋʋtẽ ye, la a ra wa yẽes a we-kεεng ne a rɩtg ye, la a ra tʋg n vʋʋsd laok pʋgẽ ye».

Yii ɑ Abɩɩ Hʋrɑyrɑt nengẽ (Wẽnd yɑrd be ɑ yĩngɑ) ɑ yeelɑme: tɩ Wẽnd Tẽn-tʋʋma (Wẽnd pʋʋsg la A tɩlgr be a yĩngɑ) a yeelame: «Yãmb ned fãa sã n yik a gõeemẽ wã, bɩ a fẽes a yõorã noor a tãabo, ad a sʋɩɩtãanã a gãandeda a yõorẽ wã».

Yii a Anas nengẽ, (Wẽnd yard be a yĩnga) a yeelame: Nabiyaamã (Wẽnd pʋʋsg la A tɩlgr be a yĩnga) rag n yɩɩme n pekdẽ, maa n soodẽ, ne saawalle n tʋg n tãag mud a nu, la a yõgd koom ne mudri.

Yii a Abɩɩ Hʋrayrat nengẽ, (Wẽnd yard be a yĩnga), tɩ yii Nɑbiyɑɑmã nengẽ, (Wẽnd pʋʋsg la A tɩlgr be a yĩngɑ) yeelame: «Wẽnd pa reegd yãmb yem kãm fãa pʋʋsgo, t'a sã n rẽgme, halɩ t'a wa yõk koom».

Yii a Gεεbr nengẽ (Wẽnd yard be a yĩnga), t'a yeelame: a ʿƲmar ɭbn Al-Haṭṭaab kõo maam kibare: Tɩ ned n yõk koom n bas nu-yẽeg zĩiga a na-kãdmẽ wã, tɩ Nabiyaamã (Wẽnd pʋʋsg la A tɩlgr be a yĩnga) yeel-a: «lebg n tɩ maneg f koomã yõgbo» t'a lebg n tɩ manege, rẽ poorẽ t'a pʋʋse.

Yii a ʿAbdʋllaah ɭbn ʿAmr nengẽ (Wẽnd yard be b yiibã yĩnga) t'a yeelame: Tõnd lebgame, tõnd la Wẽnd Tẽn-tʋʋmã, (Wẽnd pʋʋsg la A tɩlgr be a yĩnga), n yi Mak n tʋgd Madiina, halɩ tɩ tõnd wa be koom zĩigẽ sẽn be sorã zugu, tɩ neb yãg Laansarã wakato, n yõge tɩ bãmb yaa sẽn yãgde, tɩ tõnd kẽng b nengẽ, tɩ b na-kãsen-kãya yaa sẽn tonde, tɩ koomã ka ta beenẽ ye, tɩ Wẽnd Tẽn-tʋʋm yeele: (Wẽnd pʋʋsg la A tɩlgr be a yĩnga) «Wɩɩbd be ne na-kẽsen-kayã sẽn yaa Bugum, yõk-y koomã tɩ ta».

Yii a ʿAmr ɭbn ʿAaamir nengẽ, tɩ yii a Anass ɭbn Maalik nengẽ, t'a yeelame: Nabiyaamã (Wẽnd pʋʋsg la A tɩlgr be a yĩnga) ra yɩɩme n yõkd koom Pʋʋsg fãa wakato, tɩ mam yeele: la yãmb rag n maanda wãn-wãna? T'a yeele: koom yõkr a yembr sekda tõndo, tɩ koomã sã n ka kao.

Yii a ɭbn ʿAbaas nengẽ, (Wẽnd yard be b yiibã yĩnga), a yeelame: Nabiyaamã (Wẽnd pʋʋsg la A tɩlgr be a yĩnga) yõga koom vugr-vugri.