Yii a ʿAbdʋllaah ɭbn ʿAmr nengẽ, (Wẽnd yard be b yiibã yĩnga): Tɩ raoa n sok Nabiyaamã (Wẽnd pʋʋsg lɑ A tɩlgr be ɑ yĩngɑ) lɩslaangã yell bʋdo sõmblem n yɩɩde? T'a yeele: «rɩlg rɩɩbo la f ning sallem fo sẽn bãng a soab la fo sẽn ka bãng a soaba».

Yii Abɩɩ Hʋrɑyrɑt nengẽ (Wẽnd yɑrd be ɑ yĩngɑ) tɩ Wẽnd Tẽn-tʋʋmɑ (Wẽnd pʋʋsg la A tɩlgr be a yĩnga) ɑ yeelame: «Rẽ yĩnga, m ka na n kõ yãmb kibare, ne bũmb ning Wẽnd sẽn yẽesd zũnuub-rãmb ne-a, la A zẽkd dargε-rãmb ne-a?» La b yeele: N-yee, Wẽnd Tẽn-tʋʋma, la a yeele: «yaa koom yõk tɩ ta ne sẽn ka noomã fãa, la na-tagdɩ wʋsgo n tʋg miisã wã, la kolled Pʋʋsgo, Pʋʋsg loogr poorẽ, ad yaa yẽ bal la Ar-rɩbaate (kor n gɩd bεεba)».

Yii Abʋʋ Hʋrɑyrɑt nengẽ (Wẽnd yɑrd be ɑ yĩngɑ) a yeelɑme: Wẽnd Tẽn-tʋʋmɑ (Wẽnd pʋʋsg lɑ A tɩlgr be ɑ yĩngɑ) ɑ yeelame: «Muumin sẽn tar pãnga, yẽnda sõmblem, n leb n nong Wẽnd n yɩɩd muumin sẽn yaa valenga, la b fãa yaa sõma, maan yã-beed ne bũmb ning sẽn nafd foomã, la f kos sõngr ne Wẽnde la f ra kong ye, la bũmb sã n paam foom bɩ f ra yeele: m sã n da maan woto yɩtẽ la woto la woto. La yeele: Wẽnd n korde, A sẽn ratã me la A maan yã, bala (sã n da yɩ woto wã) a pakda sʋɩɩtãan tʋʋma».

Yii a ɭbn Ʋmar nengẽ, -Wẽnd yard be n yiibã yĩnga-, a yeelame: Wẽnd Tẽn-tʋʋmã -Wẽnd pʋʋsg la A tɩlgr be a yĩnga- yeelame: "A Gibriil ka bak n sagend maam ne yaka, halɩ tɩ mam da tẽed t'a na n lagem-a-la fa-rɩtbẽ wã".

Yii ɑ Abɩɩ Addardaa' nengẽ -Wẽnd yɑrd be ɑ yĩngɑ- yii Nabiyaamã nengẽ- Wẽnd pʋʋsg la A tɩlgr be a yĩnga- a yeelame-: "Ned sã n zab n sõng a ma-bi taag burkĩnd lillgri, Wẽnd na n tusa a nengã n yi Bigmã yikr raarã".

Yii a Anas nengẽ (Wẽnd yard be a yĩnga) tɩ yii Nabiyaamã nengẽ, (Wẽnd pʋʋsg la A tɩlgr be a yĩnga) a yeelame: «Yãmb yembr fãa ka kõt sɩda (ne Wẽnde) hal t'a wa tʋg n nong ne a ma-biiga bũmb ning a sẽn nong ne a mengã».

Yii a ʿAaɩša nengẽ -Wẽnd yarde be a yĩnga- sẽn yaa Nabiyaamã pagã (Wẽnd pʋʋsg la A tɩlgr be a yĩnga), tɩ yii Wẽnd Tẽn-tʋʋm nengẽ, (Wẽnd pʋʋsg la A tɩlgr be a yĩnga) yeelame: «Ad bʋg-bʋg ka zĩndid bũmb pʋgẽ rẽndame t'a nags-a, b ka kongd-a bũmb pʋgẽ me rẽndame t'a zang-a».

Yii a Abɩɩ Hʋrayrat nengẽ, (Wẽnd yard be a yĩnga), tɩ yii Nɑbiyɑɑmã nengẽ, (Wẽnd pʋʋsg la A tɩlgr be a yĩngɑ) a yeelame: «Ad dĩin-kãngã yaa yol-yole, ad ned ka kengd dĩinã rẽndame t'a wil-a, bɩ y gãd taab kãenkãe, la y pẽneg taaba, la kõ taab sũ-noogr kibare, la y sõng taab yibeoog la zaabre la yʋngã pedgo».

Yii a Anas ɭbn Maalik nengẽ - Wẽnd yard be a yĩnga: tɩ yii Nabiyaamã nengẽ, (Wẽnd pʋʋsg la A tɩlgr be a yĩnga) t'a yeelame: «Yols-y la y ra keng ye, la y noog nebã sũy la y ra yεεs-b ye».

Yii a Anas nengẽ- Wẽnd yard be a yĩnga- a yeelame: Tõnd rag n bee d zu-soaba a ʿƲmar nengẽ t'a yeele: «B gɩdga tõnd n yi maan-tɩ-looge».

Yii a ʿƲmar biig nengẽ (Wẽnd yard be b yiibã yĩnga) tɩ Wẽnd Tẽn-tʋʋmã, (Wẽnd pʋʋsg la A tɩlgr be a yĩnga) yeelame: «Yãmb ned fãa sã n na n rɩ, bɩ a rɩ ne a rɩtgo, a sã n na n yũ, bɩ a yũ ne a rɩtgo, bɑlɑ a sʋɩtãan rɩta ne a gobre, la a yũud ne a gobre».

Yii a ʿƲmar ɭbn Abɩɩ Salama nengẽ (Wẽnd yard be a yĩnga) a yeelame: Mam da yaa biiga, n be Wẽnd Tẽn-tʋʋmã, (Wẽnd pʋʋsg la A tɩlgr be a yĩnga) naoẽ wã, la mam nugã rag n babenda laagã pʋgẽ, tɩ Wẽnd Tẽn-tʋʋmã, (Wẽnd pʋʋsg la A tɩlgr be a yĩnga) yeel maam: « Biiga, f sã n na n rɩ bɩ f yeel bismillaah, la f rɩ ne f rɩtgo, la f rɩ f taoorã». Rẽnd mam rɩɩb ka bak n yaa woto bala, rẽ sẽn loogr tεkɑ.