Yii a Gεεbr ɭbn Abdʋllaah nengẽ, -Wẽnd yard be b yiibã yĩnga-, tɩ Nabiyaamã, (Wẽnd pʋʋsg la A tɩlgr be a yĩnga), yeelame: "Maan neer buudã fãa yaa doaaga".

Yii a Abɩɩ Hʋrayrat nengẽ, (Wẽnd yard be a yĩnga), tɩ yii Tẽn-tʋʋmã nengẽ, (Wẽnd pʋʋsg la A tɩlgr be a yĩnga) a yeelame: «Ned fãa tara doaag a sũgsã fãa zugu, wĩntoog sẽn na n puk fãa tɩ fo maneg zabd-n-tɑɑs a yiib ne taab sʋka, f tara doaaga, fo sẽn na n sõng ned ne a rũnga, n zẽk-a n zombg a rũngã zugu, maa n zẽk a teedã n roglge, yaa doaaga, gom-yɩlenga yaa doaaga, nag-tagdr fãa fo sẽn yãk n rabd Pʋʋsgẽ yaa doaaga, la tus bũmb sẽn namsd nebã n yi sor zugu, yẽ me yaa doaaga».

Yii a Abɩɩ Barzat Al-aslamiy nengẽ (Wẽnd yard be a yĩnga) a yeelame: Wẽnd Tẽn-tʋʋm (Wẽnd pʋʋsg lɑ A tɩlgr be ɑ yĩngɑ) a yeelame-: «Yamb nao-kadem a yiibã ka na n zẽke, halɩ tɩ b wa tʋg n sok-a a vɩɩmã a sẽn sεεs-a zĩig ningã, la a bãngrã, a sẽn tʋm bũmb ning ne-a, la a arzεkã, yaa yε la a paam-a la a kẽes-a-la yεεnẽ, la a yĩngã a sẽn kʋɩdg-a zĩig ningã».

Yii a Abʋʋ Hʋrayrat nengẽ (Wẽnd yard be a yĩnga) a yeelame: Nabiyaamã (Wẽnd pʋʋsg la A tɩlgr be a yĩnga) yeelame-: «Ned sẽn yãs ne pʋg-kõor rɩlgre la nimbãan nedã, a yaa wala ned sẽn zabd gɩhaadɩ Wẽnd sorã pʋgẽ, maa a yaa wala ned sẽn yãs yʋngo ne Pʋʋsgo n loet noor wĩntoogo»

Yii a Abɩɩ Hʋrayra nengẽ, -Wẽnd yard be a yĩnga-, tɩ yii Wẽnd Tẽn-tʋʋm nengẽ, -Wẽnd pʋʋsg la A tɩlgr be a yĩnga- a yeelame: "Ned ning sẽn kõta sɩd ne Wẽnde la Yaoolem raarã bɩ a yeel sẽn be neere maa a sĩndi, la ned ning sẽn kõta sɩd ne Wẽnde la yaoolem raarã bɩ a waoog ɑ yaka, la ned ning sẽn kõta sɩd ne Wẽnde la yaoolem raarã bɩ a waoog ɑ sãana".

Yii a Abɩɩ Zarr nengẽ -Wẽnd yard be a yĩnga- a yeelame: Nabiyaamã -Wẽnd pʋʋsg la A tɩlgr be a yĩnga- yeela maam: "Ra wa tʋg n paoog manegr ye, baa tɩ fo na n sega f ma-bi taag ne neng sẽn yõgemde".

Yii a ʿAbdʋllaah ɭbn Al-mas’ʿʋʋd nengẽ, (Wẽnd yard be a yĩnga), a yeelame: Wẽnd Tẽn-tʋʋmã yeelame, (Wẽnd pʋʋsg la A tɩlgr be a yĩngɑ): «Tabl-y sɩda, tɩ ad sɩd peegdame n tʋgd manegre, la manegr peegdame n tʋgd arzãna, la ned ka bakd n togsd sɩda la a gũusd sɩd togsgo, halɩ tɩ b wa tʋg n gʋls-a Wẽnd nengẽ t'a yaa sɩd soaba. La y gũus ne zĩri-beedo, tɩ ad zĩri-beed peegdame n tʋgd wẽngẽ, wẽng me peegdame n tʋgd Bugmẽ, la ned ka bakd n yagda la a tũusd yagbo, hal tɩ b wa tʋg n gʋls-a Wẽnd nengẽ t'a yaa pʋ-yagda».

Yii a Gεriir ɭbn Abdʋllaah nengẽ, -Wẽnd yard be a yĩnga-, a yeelame: Wẽnd Tẽn-tʋʋmã, -Wẽnd pʋʋsg la A tɩlgr be a yĩngɑ- yeelame: "Ned ning sẽn ka yolsda nebã, Wẽnde, A Naam yɩ wagell n zẽka, A ka yolsd-a ye".

Yii a ʿAbdʋllaah ɭbn ʿAmr nengẽ (Wẽnd yard be b yiibã yĩnga) tɩ Nabiyaamã, (Wẽnd pʋʋsg la A tɩlgr be a yĩnga) yeelame: «Yolsdbã, Arrahmaan Naab na n yols-b lame, yols-y sẽn be b tẽngã, tɩ sẽn be a saasẽ wã na n yolsa yãmba».

Yii a ʿAbdʋllaah ɭbn ʿAmr nengẽ, (Wẽnd yard be b yiibã yĩnga), a yeelame: Wẽnd Tẽn-tʋʋma, (Wẽnd pʋʋsg lɑ A tɩlgr be ɑ yĩngɑ) yeelame: «Lɩslaama yaa ned ning lɩslaambã sẽn tɩlg n yi a zelemde la a nugu, la muhaagɩrʋ (ned ning sẽn yik ne a dĩin n zoetẽ), yẽ la ned ning sẽn bas bũmb ning Wẽnd sẽn gɩdgã».

Yii Abɩɩ Hʋrɑyrɑt nengẽ- Wẽnd yɑrd be ɑ yĩng-ɑ yeelɑme: mɑm wʋmɑ Wẽnd Tẽn-tʋʋmɑ (Wẽnd pʋʋsg la A tɩlgr be a yĩnga) t'ɑ yetẽ: «Lɩslɑɑm hɑkε ɑ lɩslɑɑm tɑɑg zugu, yɑɑ nu: yɑɑ Sɑllem leokre, lɑ bãɑd kɑɑgre, lɑ kũ-rãmb yãɑgre, lɑ bool sɑkre; lɑ tĩsd leokre».

Yii Abɩɩ Hʋrɑyrɑt nengẽ (Wẽnd yɑrd be ɑ yĩngɑ) ɑ yeelɑme: tɩ Wẽnd Tẽn-tʋʋmɑ (Wẽnd pʋʋsg lɑ A tɩlgr be ɑ yĩngɑ) ɑ yeelame: «Y ka kẽed arzãnã halɩ tɩ y wa kõ sɩda, la y ka na n kõ sɩda halɩ tɩ y wa noang taaba, rẽ yĩnga, m ka na n wilg yãmb bũmbu, tɩ y sã n maan-a, y bʋʋda taab nonglem?: Sẽeg-y pʋʋsgã y ne taab zugu».