/ Muumin sẽn tar pãnga, yẽnda sõmblem, n leb n nong Wẽnd n yɩɩd muumin sẽn yaa valenga, la b fãa yaa sõma,

Muumin sẽn tar pãnga, yẽnda sõmblem, n leb n nong Wẽnd n yɩɩd muumin sẽn yaa valenga, la b fãa yaa sõma,

Yii Abʋʋ Hʋrɑyrɑt nengẽ (Wẽnd yɑrd be ɑ yĩngɑ) a yeelɑme: Wẽnd Tẽn-tʋʋmɑ (Wẽnd pʋʋsg lɑ A tɩlgr be ɑ yĩngɑ) ɑ yeelame: «Muumin sẽn tar pãnga, yẽnda sõmblem, n leb n nong Wẽnd n yɩɩd muumin sẽn yaa valenga, la b fãa yaa sõma, maan yã-beed ne bũmb ning sẽn nafd foomã, la f kos sõngr ne Wẽnde la f ra kong ye, la bũmb sã n paam foom bɩ f ra yeele: m sã n da maan woto yɩtẽ la woto la woto. La yeele: Wẽnd n korde, A sẽn ratã me la A maan yã, bala (sã n da yɩ woto wã) a pakda sʋɩɩtãan tʋʋma».
A Muslim n togs-a

Explanation

Nabiyaamã (Wẽnd pʋʋsg lɑ A tɩlgr be ɑ yĩngɑ) vẽnegdame n wilgdẽ, tɩ muunim fãa gillã yaa sõma, la sɩd-kõt ning sẽn yaa pãng soabã, a sɩd-kũunẽ wã la a loe-n-wãagẽ wã la a arzεkẽ wã, la zẽng sẽn ka rẽ, sẽn yaa pãngã nems fãa, yẽ sõmblem n leb n noom Wẽnde (A Naam yɩ wagell n zẽke) n yɩɩd sɩd-kõt ning sẽn yaa valengã. Rẽ poorẽ Nabiyaamã (Wẽnd pʋʋsg lɑ A tɩlgr be ɑ yĩngɑ) a sagla muunim t'a rɩk sabab-rãmbã yεl nins sẽn na n naf-a, sẽn yaa dũni yεla la yaoolem raar yεla, n lagem ne sẽn na n tik Wẽnde, (A yɩlgame n zẽke), n kos sõngr ne-A, la f bobl f meng ne-A. Rẽ poorẽ tɩ Nabiyaamã (Wẽnd pʋʋsg lɑ A tɩlgr be ɑ yĩngɑ) gɩdg kongre la kʋɩɩngo, la yĩn-kiiri, ne tʋʋm nins sẽn nafd foomã maaneg dũni la laahre. Rẽnd sɩd-kõt sã n nidg pãng tʋʋm pʋgẽ, n rɩk sabab-rãmbã n kos sõngr ne Wẽnde, n bao sõma Wẽnd nengẽ, bũmb ka leb n rog yẽndã zugu rẽndame t'a bobl a yεlã gill ne Wẽnde, la a bãng tɩ Wẽnd sẽn tũus bũmb ningã (A Naam yɩ wagell n zẽke) rẽ la sõma, rẽnd masɩɩb sã n paam yẽnda rẽ poorẽ, bɩ a ra yeele: "m sã n da maan woto yɩtẽ la woto la woto"; "Bala (sã n da yɩ woto wã) a pakda sʋɩɩtãan tʋʋma" ne fo sẽn tõdg Pʋlengã, la f maan nimis ne sẽn loogã. La ɑ sõmb n yelame t'ɑ yaa sẽn bas ɑ meng n tũ Wẽnde n yɑɑ yardɑ: "Wẽnd n korde, A sẽn ratã me la A maan yã", Rẽnd bũmb ning sẽn yɩ wã, a zemsa ne Wẽnd sẽn rat bũmb ningã, bala A maanda A sẽn rate, bũmb ka be n tõe n tus A Pʋlengã, A sẽn bʋ bũmb ningã me pʋgd ka be n na n sok ye.

Hadeeth benefits

  1. Yaa nebã sẽn põs taab sɩd-kũunã pʋgẽ wã.
  2. Yaa b sẽn bʋ pãng nonglem tʋʋmã pʋsẽ, bala yõod tõe n paama a pʋgẽ, sẽn ka be valengẽ wã ye.
  3. Ninsaal sõmbame n maan yã-beed ne bũmb ning sẽn nafd-a la a bas sẽn ka nafd-a.
  4. Roga ne sɩd-kõta t'a kos Wẽnd t'a sõng-a a yεlã fãa pʋgẽ, la a ra teeg a mengã ye.
  5. Hadiisã tabenda Wẽnd Bʋʋdã la A Pʋlengã, la rẽnda ka gɩdg tɩ b rɩk sabab-rãmba la b kẽne n bao yεl-sõma ye.
  6. A gɩdgdame tɩ b yeele: (sã n da yɩ woto wã), tɩ yaa wala gẽeg la fo maand masɩɩb-rãmb sigb wakato, la a leb n wilgdame tɩ yaa haraam ne fo sẽn na n tõdg Wẽnd Bʋʋdã la A Pʋlengã, (A Naam zẽk yã).