Yii a Gʋbayr nengẽ, -Wẽnd yard be a yĩnga- t'a wʋma Nabiyaamã -Wẽnd pʋʋsg la A tɩlgr be a yĩnga- t'a yetẽ: "Rog wãas ka kẽed arzãn ye".

Yii a Anas nengẽ -Wẽnd yard be a yĩnga- tɩ ad Tẽn-tʋʋmã -Wẽnd pʋʋsg la A tɩlgr be a yĩnga- yeelame: "Ned ning sẽn wa n tʋlla tɩ b yalg a rɩtlã la b yaool a vũunã, bɩ a tõk a rogmã".

Yii a Abdʋllaah ɭbn Amr nengẽ, -Wẽnd yard be b yiibã yĩnga-, tɩ yii Nabiyaamã nengẽ, (Wẽnd pʋʋsg la A tɩlgr be a yĩnga) a yeelame: «Ad rog tõkdɑ pɑ sẽn mɑɑndɑ neere n rondẽ wã ye, lɑ ɑd rog tõkdɑ yɑɑ b sẽn nɑ n wãɑg ɑ soɑb rogem, lɑ a sẽn tõkd-ɑ».

Yii a Abɩɩ Hʋrayrat nengẽ, -Wẽnd yard be a yĩnga-, tɩ Wẽnd Tẽn-tʋʋma, -Wẽnd pʋʋsg la A tɩlgr be a yĩnga- a yeelame: "Yãmb mii wɩdg sẽn yaa a sab bɩɩ?" Tɩ b yeele: Wẽnd la A Tẽn-tʋʋmã n yɩɩd minim, t'a yeele: " yaa fo sẽn na n tẽeg f saam-biig yelle, bũmb ninga a sẽn kisi", tɩ b yeele: la sã n mikame tɩ mam sẽn yet bũmb ningã bee mam saam-biigẽ wã? T'a yeele: " fo sẽn yetã sã n be a nengẽ fo wɩd-a lame, la sã n ka be a nengẽ, f yaga zĩri-beed n rogl-a.

Yii a ɭbn ʿƲmar nengẽ, (Wẽnd yard be n yiibã yĩnga), a yeelame: Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yeelame: «Sẽn suud fãa yaa rãam, la sẽn suud fãa me yaa haraam, la ned ning sẽn yũ a rãam dũni pʋgẽ, n maan kaalem tɩ yẽnda yaa sẽn yũud rãam, n ka tuubi, a ka yũud-a laahr raar ye».

Yii a Abɩɩ Hʋrayrat nengẽ, (Wẽnd yard be a yĩnga) a yeelame: Wẽnd Tẽn-tʋʋmã (Wẽnd pʋʋsg la A tɩlgr be a yĩngɑ) a kãaba zãmb soaba la sẽn reegd-a n na n maan zãmbã bʋʋd pʋgẽ.

Yii a Abɩɩ Hʋrayrat nengẽ, (Wẽnd yard be a yĩnga), tɩ yii Nɑbiyɑɑmã nengẽ, (Wẽnd pʋʋsg la A tɩlgr be a yĩngɑ) ɑ yeelame: «Gũus-y y mens ne sãmbse, tɩ ad sãmbsã la gom sẽn tʋg n yɩɩd zĩri-beedo, la y ra pẽes n bãnge, la y ra vees n bãng ye, la y ra maan taab sũ-kiir ye, ra rabs-y taab ye, ra n gẽ-y taab ye, la y yɩ Wẽnd yembse, n yaa ma-biisi».

Yii a Hʋzayfa nengẽ -Wẽnd yard be a yĩnga- a yeelame: m wʋma Nabiyaamã -Wẽnd pʋʋsg la A tɩlgr be a yĩnga- t'a yetẽ: "Gom rɩgsd ka kẽed arzãn ye"

Yii Abʋʋ Hʋrɑyrɑt nengẽ (Wẽnd yɑrd be ɑ yĩng) ɑ yeelɑme: mɑm wʋmɑ Wẽnd Tẽn-tʋʋmɑ (Wẽnd pʋʋsg lɑ A tɩlgr be ɑ yĩngɑ) t'ɑ yetẽ: «Mam poorẽ rãmbã fãa yaa sẽn yɑɑf-b rãmbɑ, sã n ka vẽnegdbã, la sẽn be vẽnegrã pʋgẽ, yaa ned sẽn na n maan tʋʋm yʋngo, n vẽeg beoog tɩ Wẽnd luda a bãngo, t'a tʋg n yetẽ: zagla! Ad yʋngẽ mam maana woto la woto, ad yẽ rag n gãanda yʋngẽ t'a Soabã yaa sẽn lud a bãngo, t'a vẽeg beoong n pãrgd Wẽnd sʋtrã (bãn-loeerã) n basd a mengã».

Yii a ɭbn ʿƲmar nengẽ (Wẽnd yard be b yiibã yĩnga): Tɩ Wẽnd Tẽn-tʋʋmã (Wẽnd pʋʋsg la A tɩlgr be a yĩnga) a goma ne neba, Mak pakrã raare, n yeele: «yãmb ɑ neba! Ad Wẽnd sεεsa zɩɩlem sasa yεlã n bas yãmbã, la ɑ wug-m-menga ne yaab-rãmbã, rẽnd nebã yaa neb a yiibu: manegdɑ sẽn yaa Wẽn-zoεta n yɑɑ tɩrg Wẽnd nengẽ, la nin-wẽnga sẽn yaa zu-be-neda n yaa yaalg Wẽnd nengẽ. La nebã yaa a Adam koamba, la Wẽnd naana a Adam ne tom. Wẽnd yeelame, A Naam zẽkame:{ yãmb ɑ nebã ɑd Tõnd nɑɑnɑ yãmb n yi rɑo lɑ pɑgẽ, lɑ D mɑɑn yãmb tɩ yɑɑ zãmɑɑn fãɑ ne ɑ neb, lɑ buu-rãmbɑ bʋl yĩng tɩ y bãng tɑɑbɑ, ɑd yãmb wɑoor sẽn yɩɩdɑ Wẽnd nengẽ yɑɑ sẽn yɩɩdɑ ne Wẽn-zoεεg yãmb pʋgẽ, ɑd Wẽnd yɑɑ Mitɑ n yɑɑ Minim-tẽng-n-biigɑ} [Al-Hugrɑɑt: 13]».

Yii Aaɩsa nengẽ -Wẽnd yard be a yĩnga- tɩ yii Nabiyaamã nengẽ -Wẽnd pʋʋsg la A tɩlgr be a yĩnga- a yeelame: "Ad nebã sẽn yɩɩd gẽeg Wẽnd nengẽ, yaa zab-to neda".

Yii Abɩɩ Bakr nengẽ- Wẽnd yɑrd be ɑ yĩng- ɑ yeelɑme: mɑm wʋmɑ Wẽnd Tẽn-tʋʋmɑ -Wẽnd pʋʋsg lɑ A tɩlgr be ɑ yĩngɑ- t'ɑ yetẽ: « Lɩslaamb a yiib sã n yek taab ne b sʋʋsã, nin-kʋʋdã la kiidã fãa bee Bugmẽ«, tɩ mam yeele: Wẽnd Tẽn-tʋʋmã, yãwã yẽ la nin-kʋʋdã, tõnd mii yẽndã yellã, la kiidã yaa bõe yĩng t'a kẽed Bugmẽ? La a yeele: «ad yẽ me rag n yɩɩme n tar yã-beedo, n na n kʋ a tũud-d-ntaagã».