Yii a ʿAbɩɩ Mas'ʿʋʋd nengẽ, (Wẽnd yard be a yĩnga), tɩ yii Nɑbiyɑɑmã nengẽ, -Wẽnd pʋʋsg la A tɩlgr be a yĩngɑ- a yeelame: «Rao sã n rɩlg a zak rãmbã n tẽed a yel-sõmde, yẽnda yaa sãra ne-a».

Yii a Abɩɩ Hʋrayrat nengẽ, (Wẽnd yard be a yĩnga), tɩ Wẽnd Tẽn-tʋʋma, (Wẽnd pʋʋsg la A tɩlgr be a yĩnga) yeelame: «Ninsaal sã n ki, a tʋʋmã wãagdame rẽnda a tãabo: rẽnda do-paadga, maa bãngr b sẽn nafd ne-a, maa bi-sõng sẽn kot Wẽnd n kõt-a»

Yii a Maalik ɭbn Aws ɭbn Al-hadaṯaan nengẽ, a yeelame: mam kẽngame n tʋg n yetẽ: ãnda n na n tek ligdã? La A Talhat ɭbn Ʋbayd Allaah yeel yã, la mikame t'a bee a ʿƲmar ɭbn Hattaab nengẽ (Wẽnd yard be b yiibã yĩnga): wa ne fo sãnemã la f kẽng n lebg n wa, tɩ tõnd sõgnã sã n wɑ, d na kõ-f f wanzurã, t'a ʿƲmar ɭbn Hattaab yeele: ayoo, m wẽen ne Wẽnde, maa tɩ f kõ-a a wanzurã mas-masã la f reeg f sãnemã, sã n ka rẽ bɩ f lebs-a a sãnemã, bala Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yeelame: «Wanzuri tek ne sãnem yaa rɩbaaga, sã n ka (kiig la f kõ-ma m laaga) reeg la f wa ne, Bʋrr ne Bʋrr tek taab me yaa rɩbaaga, sã n ka reeg la f wa ne, saʿɩɩr ne saʿɩɩr tek taab me yaa rɩbaaga, sã n ka reeg le f wa ne, tamarʋ ne tamarʋ tek taab me yaa rɩbaaga, sã n ka reeg la f wane».

Yii a ʿAbdallah ɭbn Salaam nengẽ (Wẽnd yard be a yĩnga) a yeelame: Nabiyaamã (Wẽnd pʋʋsg la A tɩlgr be a yĩnga) sẽn wa n wa Madiinã, nebã tigma taaba n na n yεk-a, la b yeele: Wẽnd Tẽn-tʋʋmã (Wẽnd pʋʋsg la A tɩlgr be a yĩnga) waame, Wẽnd Tẽn-tʋʋmã waame, Wẽnd Tẽn-tʋʋmã waame, noor a tãabo, tɩ ma me tũ neb n na n wa ges-a, m sẽn wa n yẽnd-a wã m bãngame t'a nengã ka zĩri-be-ned neng ye, rẽnd rẽenem bũmb mam sẽn wʋm-a t'a gome, a yeelame: «Yãmb a nebã! Sẽeg-y Sallem, la y rɩlg rɩɩbo, la y tõk rogem, la y pʋʋs yʋngo tɩ nebã gõe, tɩ y nɑ kẽ arzãnã ne laafɩ».

Yii a Abɩɩ Hʋrayrat nengẽ (Wẽnd yard be a yĩnga) a yeelame: Wẽnd Tẽn-tʋʋma (Wẽnd pʋʋsg la A tɩlgr be a yĩnga) yeelame: «Yãmb a nebã, ad Wẽnd yaa yɩlgemde, la A ka reegd rẽnda yɩlgemde, la ad Wẽnd sagla sɩd-kõtbã ne bũmb ning A sẽn sagl tẽn-tʋʋmbã; n yeele: {Yãmb ɑ Tẽn-tʋʋmba! Rɩ-y rɩ-yɩlmã sẽn yaa halaal rɩɩbo, la y maan tʋʋm-sõma, ad Mam mii yãmb sẽn maand bũmb ninsã wã}. [23. Al-muu'minuun (Sɩd-kõtbã sʋʋra): 52 ] la A yeele: {Yɑɑ yãmb sẽn kõ-b sɩdɑ! Rɩ-y bõn-yɩlmɑ Tõnd sẽn rɩlg yãmbã lɑ y pʋʋs Wẽnd bɑrk tɩ sã n yɑɑ Yẽ lɑ y tũudã} [2. Al-baƙara (Naafã sʋʋra):172]. Rẽ poorẽ tɩ Nɑbiyɑɑmɑ tẽeg rao yelle, sor sẽn wogle, t'a zugã bɩre n puki, t'a zẽk a nus a yiibã n tʋg saasẽ wã n yetẽ: "m Soab A Wẽnde! Sõng-ma", la a rɩtlã yaa haraam, a sẽn yeelgã yaa haraam, a bõn-yũudɩ wã yaa haraam, b leb n rɩlg-a-la ne haraam, b na n reega kos-kãngã wãn-wãna?»

Yii a Abʋʋ Hʋrayrat nengẽ -Wẽnd yard be a yĩnga- a yeelame: Wẽnd-tẽn-tʋʋm -Wẽnd pʋʋsg la A tɩlgr be a yĩng- yeelame-: «Ned ning sẽn kollɑ keelem soɑbɑ, mɑa ɑ bɑsɑ bũmb tɩ lʋɩ sɑmdẽ wã, sɑm soɑbã yĩngɑ, Wẽnd kẽesd-ɑ-lɑ Al-Arsã mɑɑsmẽ dũni yikr rɑɑrã, rɑɑr ning mɑɑsem sẽn kɑ be tɩ sã n kɑ A mɑɑsmã».

Yii a Gεεbr nengẽ (Wẽnd yard be a yĩnga) tɩ Wẽnd Tẽn-tʋʋma, (Wẽnd pʋʋsg la A tɩlgr be a yĩnga) yeelame: «Wẽnd nɑ yols nedɑ, sẽn yɑɑ bɑs-tɩ-loog t'ɑ sã n nɑ n koose, lɑ ɑ sã n nɑ n dɑ, lɑ ɑ sã n nɑ n sok ɑ sɑmde».

Yi a Abɩɩ Hʋrayrat nengẽ, (Wẽnd yard be a yĩnga), tɩ Wẽnd Tẽn-tʋʋma, (Wẽnd pʋʋsg la A tɩlgr be a yĩnga) yeelame: «Ned n dɑ be n pengd nebã, lɑ ɑ rɑ yetɑ ɑ tʋʋm biigã: fo sã n kẽng keelem soɑb nengẽ bɩ f bɑs-ɑ, tɩ tõe tɩ Wẽnd yɑɑf n bɑs-do, t'ɑ wɑ mɑɑn kɑɑlem tɩ Wẽnd yɑɑf-ɑ».

Yii a Hawla Al-ansaary nengẽ -Wẽnd yard be a yĩnga- a yeelame: m wʋma Nabiyaamã -Wẽnd pʋʋsg la A tɩlgr be a yĩnga- t'a yetẽ: " Ad neb n be beenẽ n fãood Wẽnd arzεkã pʋgẽ, tɩ ka tũ ne hakε ye, ad b rãmb tara Bugum dũni yikr raare".

Yii a Abɩɩ Hʋrayrat nengẽ (Wẽnd yard be a yĩnga) a yeelame: Wẽnd Tẽn-tʋʋma (Wẽnd pʋʋsg la A tɩlgr be a yĩnga) yeelame: «Wẽnd yeelame: Adem-biig tʋʋmã fãa yaa yẽ n so, rẽnda a no-loeerã, ad yẽnda yaa Maam n so la Maam n yaood yẽ, la no-loeerã yaa gãongo, la yãmb kɑm fãɑ no-loeer raare, bɩ ɑ ra maan kẽed-n-taar ye la a rɑ pãb no-pend ye, la ned sã n tʋ-a maa zab ne-a, bɩ a yeele: ad mam yaa ned sẽn loe noore. Lɑ mɑm wẽenda ne a Mʋhammad yõorã sẽn be Naab ningã nugẽ wã, no-loεt noorã yũug Wẽnd nengẽ ɑ noomame yɩɩd misk yũugu, no-loεt tara sũ-nood a yiibu, n kɩdemd ne-ba: a sã n wa kao noorã a kɩdemdame, la a sã n seg a Soabã, a kɩdemda ne a no-loeerã».

Yii a Abʋʋ Hʋrayrat nengẽ -Wẽnd yard be a yĩnga- a yeelame: Wẽnd Tẽn-tʋʋma -Wẽnd pʋʋsg la A tɩlgr be a yĩng- yeelame: «Ned ning sẽn loe Ramadaanã, ne liimaoongo (sɩd kũuni) la yel-sõmd tẽebo, b yaafd-a lame, a zunuubã sẽn reng taoorã».

Yii a Abɩɩ Hʋrayrat nengẽ, (Wẽnd yard be a yĩnga) a yeelame: Mam noangã, (Wẽnd pʋʋsg la A tɩlgr be a yĩngɑ) sagla maam ne yεl a tãabo: rasem a tãab no-loeer kiuug fãa, la Dʋhaa rakaar a yiibu, la m pʋʋs wɩtrã taoor tɩ m na n ka gũsi.