အွတ်စ်မာန်ဗင်န်အဖ္ဖာန်(ရဿွိယလ္လာဟုအန်ဟု)က တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)၏ ဗလီဝတ်ကျောင်းတော်ကို တိုးချဲ့ကာအဆောက်အဦးကို အသစ်တည်ဆောက်ရန် ရည်ရွယ်ခဲ့သည်။ သို့သော် လူတို့က ထိုသို့အသစ်တည်ဆောက်ပြုပြင်ခြင်းကို မနှစ်သက်ကြဘဲ ဗလီဝတ်ကျောင်းတော်ကို တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)၏ ခေတ်သမယ၌ ရှိခဲ့သည့် အခြေအနေပုံသဏ္ဍာန်အတိုင်းသာ ထားရန်နှစ်သက်ကြသည်။ ထိုအခါ အွတ်စ်မာန်ဗင်န်အဖ္ဖာန်(ရဿွိယလ္လာဟုအန်ဟု)က ပြောကြားသည်မှာ တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)မိန့်ကြားတော်မူသည်ကို ကျွန်ုပ်ကြားသိခဲ့သည်။ အကြင်သူသည် အလ္လာဟ်အရှင်မြတ်(ကျေနပ်နှစ်သက်မှု)အတွက် ရည်ရွယ်၍ ဗလီတစ်လုံးဆောက်လုပ်ခဲ့လျှင် အလ္လာဟ်အရှင်မြတ်က ၎င်းအတွက် ဂျန္နသ်သုခဘုံ၌ ထိုကဲ့သို့(အဆောင်တစ်ဆောင်)ဆောက်လုပ်ပေးတော်မူမည်။ လုပ်ရပ်အမျိုးအစားနှင့်အညီ အစားရလဒ်ရရှိခြင်းပင်ဖြစ်သည်။ သို့သော် ဂျန္နသ်ရှိအဆောက်အဦးသည် ဒွန္နယာရှိ အဆောက်အဦးနှင့် အရွယ်အစားနှင့် အရည်အသွေး တူညီသည်ဟုဆိုလိုခြင်းမဟုတ်ပါ။ ဂျန္နသ်တွင်ရှိသောအရာသည် လောကတွင်လူသားများ ဆောက်လုပ်သည့်အရာထက်ပို၍ကြီးကျယ်ခမ်းနားပြီး ပို၍လှပတင့်တယ်ပေသည်။ အဆောက်အအုံဖြစ်ခြင်း၌သာ ဆင်တူသည်ဟု ဆိုလိုခြင်းဖြစ်သည်။ အွတ်စ်မာန်(ရဿွိယလ္လာဟုအန်ဟု)က ဤအဓိပ္ပါယ်ကို ကောင်းစွာ နားလည်သည်နှင့်အမျှ ပို၍ လှပတင့်သော ပို၍ပြည့်စုံကောင်းမွန်သော ဗလီကို အလ္လာဟ်အရှင်မြတ်အတွက်သာ သီးသန့်ရည်စူး၍ တည်ဆောက်ရန် စိတ်အားထက်သန်ခဲ့သည်။