မရ်ယမ်၏ သားတော်အီစာ(အလိုင်းဟိစ္စလာမ်)သည် တမန်တော်မုဟမ္မဒ်(ဆွလ္လလ္လာဟုအလိုင်းဟိဝစလ္လမ်)၏ ရှရီအဟ်လမ်းစဉ်အတိုင်း တရားမျှတစွာ အုပ်ချုပ်သူအဖြစ် ဤအွမ္မသ်၌ ဆင်းသက်ရန် နီးကပ်ပြီဖြစ်ကြောင်း တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)က ကျိန်ဆို၍ ပြောဆိုခဲ့သည်။ တမန်တော်မြတ်(ဆွလ္လလ္လာဟုအလိုင်းဟိဝစလ္လမ်)၏ရှရီအဟ်သည် ရုပ်သိမ်းခြင်းခံရမည်မဟုတ်ပေ။ အီစာ(အလိုင်းဟိစ္စလာမ်)သည် လက်ဝါးကပ်တိုင်ကို ချိုးဖျက်မည်ဖြစ်သည်။ ဤသည် နဆွာရာ ခရစ်ယာန်တို့က ၎င်းအား အလေးအမြတ်ထားခြင်း မမှန်ကန်ကြောင်းနှင့် ခရစ်ယာန်ဘာသာကိုဖျက်သိမ်းပြီး အစ္စလာမ့်အတိုင်းသာ အုပ်ချုပ်မည်ဖြစ်ကြောင်း ပြသခြင်းပင်ဖြစ်သည်။ ဝက်များကိုသတ်မည်ဟုဆိုခြင်းသည် ၎င်းတို့ကိုစုဆောင်းခြင်း၊ စားခြင်း ဟရာမ်ဖြစ်ကြောင်းနှင့် ၎င်းတို့ကိုသတ်ပိုင်ခွင့်ရှိကြောင်း ဆိုလိုခြင်းဖြစ်သည်။ ဤတွင် ဝက်သတ္တဝါသည် ပင်ကိုမသန့်သောအရာဖြစ်ကြောင်းကို ညွှန်ပြနေသည်။ ကာဖိရ်တို့အား ၎င်းတို့၏သာသနာပေါ်တွင်ရပ်တည်ခွင့်ပြုပြီး ထိုအစား ၎င်းတို့ထံမှရယူသော ဂျစ်ဇ်ယဟ်အခွန်ကို ဖျက်သိမ်းမည်ဖြစ်သည်။ ထို့ကြောင့် ထိုအခွန်ကို လက်ခံမည်မဟုတ်ဘဲ ယင်းအစား အစ္စလာမ်သာသနာတော်ကိုလက်ခံ ယုံကြည်ရန် လူတို့အား အမိန့်ပေးတိုက်တွန်းသွားမည်ဖြစ်သည်။ အီစာ(အလိုင်းဟိစ္စလာမ်)မတိုင်မီက အချို့ ‘ဟိက်မသ်’ အမြော်အမြင်များကြောင့် ဂျစ်ဇ်ယဟ်ကို ယူဆောင်ခဲ့ကြသော်လည်း အီစာ(အလိုင်းဟိစ္စလာမ်)ခေတ်၌မူ ဥစ္စာပစ္စည်းပေါများလာပြီး ဘဏ္ဍာတိုက်များ ရရှိလာမည်ဖြစ်၍ ၎င်းတို့ကိုလက်ခံမည့်သူ တစ်ဦးတစ်ယောက်မျှပင် ရှိလိမ့်မည်မဟုတ်ချေ။ ထို့အပြင် အမှန်တရားလွှမ်းမိုး ပြန့်နှံ့သွားကာ ခိုင်လုံသော သက်သေအထောက်ထားလည်း တည်မြဲသွားပြီဖြစ်သည်။ထိုသို့သော အကြောင်းများကြောင့် ဂျစ်ဇ်ယဟ်ကို ယူတော့မည်မဟုတ်ပေ။ စည်းစိမ်ဥစ္စာများ အလွန်ပေါများလာသောကြောင့် မည်သူမျှပင် ၎င်းကို လက်ခံတော့မည်မဟုတ်ပေ။ ဤသို့ဖြစ်ရခြင်းမှာ ဗရ်ကသ်မင်္ဂလာများ ကျရောက်လာခြင်း၊ ကောင်းချီးများအဆက်မပြတ် ဖြစ်ပေါ်လာခြင်းနှင့် ကိယာမသ်နီးလာပြီဖြစ်ကြောင်း သိထားသည့်အတွက်မျှော်လင့်ချက်များ လျော့နည်းသွားပြီး အလိုရမ္မက်များ နည်းပါးသွားသောကြောင့်ဖြစ်သည်။