Laandãanã yaa bũmb sẽn na n wilg nebã tɩ Pʋʋsgã wakat taame, la laandãanã gom-biisã tigma ne sɩd-kũunã loεεga. Nabiyaamã (Wẽnd pʋʋsg la A tɩlgr be a yĩngɑ) vẽnegdame bũmb ning sẽn sõmb n maane, b sẽn wat n wʋm laandãane, yẽ me yaa wʋmdã yeele wala laandãan boaandã sẽn yetã, tɩ laandãan boaandã sã n yeele: "Allaah akbarʋ, Allaahʋ akbarʋ", wʋmdã yetame: "Allaah akbarʋ, Allaahʋ akbarʋ". Yaa woto bala, sã n ka laandãan boaandã sẽn wat n yeele: "Hayya' Alaṣ-ṣalaat, Hayya alal falaah". Rẽnd wʋmdã yetame: "laa hawla walaa ƙʋwwata ɩlaa billaah". La Nabiyaamã (Wẽnd pʋʋsg la A tɩlgr be a yĩngɑ) vẽnegdame, tɩ ned ning sẽn togsa laandãan boaandã n yetẽ, n yɩlg ne a sũurã, a kẽeda arzãnã. La laandãanã boolgã gom-biisã maanã: "Allaahʋ Akbarʋ": Rat n na n yeelame, tɩ Wẽnde, (A Naam yɩlgame), Yẽ zɩslem la a bedrem yɩɩda bũmbã fãa gilli. "Ašhadʋ an laa'ɩlaaha ɩllallaah": rat n na n yeel tɩ m maan kaset tɩ sẽn na n tũ n tɩlg sɩd-sɩda, ka be rẽnda Wẽnde. "Ashadʋ Anna Mʋhammadan rasʋlʋllaah": Rat n na n yeele, m reega m zugẽ la m maan kaset ne m zelemde, la m sũurẽ t'a Mʋhammad yaa Wẽnd Tẽn-tʋʋma, Wẽnd tʋms-a lame, (A Naam yɩ wagell n zẽke), a tũub me yaa tɩlae. "Hayya ʿAlaṣ-ṣalaatɩ": Rat n na n yeele, wa-y n kẽng-y Pʋʋsgẽ wã. La wʋmdã yeel tɩ: "laa hawla walaa ƙʋwwata ɩlaa billaah": Rat n na n yeel tɩ sɩlem ka be sẽn na n põsg yεl nins sẽn gɩdgd tũudumã, tõog ka be beenẽ yεlã fãa pʋgẽ, sã n ka sẽn tũ ne Wẽnd segl-sõngo, (A Naam zẽkame). "Hayya alal falaah" Rat n yeel tɩ wa-y n kẽng-y põsg sababẽ, yẽ me la sẽn na n paam põsg ne arzãnã la tɩlgr n yi Bugmã.